AUDIOCONTO: O MONSTRO DE CORES

Bo día, familias!

Como xa vos falei na entrada sobre a importancia das rutinas , é moi importante que no voso día a día lle adiquedes un tempo á lectura en contextos lúdicos para fomentar o hábito lector dos vosos fillos/as. Por outro lado, tendo en conta a situación que estamos atravesando resulta imprescindible axudarlles a verbalizar as súas emocións sen recrearse nin engadir máis dramatismo pero tampouco restándolle importancia ao que sinten. 

Por todo isto, a proposta que vos fago hoxe é un audioconto que seguro que moitos de vós coñecedes: "O Monstro de Cores". Como é moi probable que a maioría das familias non dispoñan do conto na casa, coa colaboración do mestre de Audición e Linguaxe do CEIP Xoaquín Loriga, puxémoslle voz e música para facer unha montaxe e que todas o teñades ao voso alcance.

Do mesmo xeito, propóñovos unha actividade para despois da lectura na que ademais de traballar lectoescritura, a rapazada deberá reflexionar e pensar dúas situacións nas que sentiran as emocións traballadas no conto: alegría, tristura, ira, medo e calma. Tamén, podedes preguntarlle por que creen que sinten esas emocións. Por exemplo, nunha situación na que sinten medo, como pode ser a situación actual por mor do COVID-19, podedes verbalizar que cando temos medo estamos máis tensos, temos un aumento de sudoración, alteración na respiración... Para eles decatarse destas cousas é complicado, por iso debedes axudarlles para que se dean conta. É moi importante que lles transmitades que non hai emocións boas e malas senón agradables e desagradables pero que todas son necesarias experimentalas nalgún momento.

Déixovos este modelo de ficha para que teñades como referencia pero podédes facelo nun folio, nun caderno que teñades na casa, etc.

Espero que vos sexa útil. Mándovos un saúdo grande!

#ficamosnacasa